Tag: habaimkaktienimkajaitbynriew

Ka Dor ki Nonghikai da i Mebateibor Khongsti

Haba phaidien ki por b'la leit,

Ki snem b'la iaid lynti,

Ngim lah shemphang ngim sngew lah ngeit,

Ïala ka Ri Khasi;

Haba jingdum jingbiej ka tap,

Sahdien tam ha pyrthei,

Nongwei u shim kabu u thap,

Ïa ka ban ïoh klun ei.

Hynrei mynta kala pher bak,

La bun ki jingkylla,

Shajrong kala nang kiew irat,

Sha kliar jingstad mynta;

Kyrhai ki khun ka Ri Khasi,

Kum khlur ki la tyngshain,

Ki pruid dak bad ki mait lynti,

Ba longdien kin bud lang.

Katne jingstad ka nang kiew sted,

Shajrong ka ïai ban klang,

To pyrkhat mano ba jaw syep,

Jingstad ha shlem ban phrang;

Mano ba bat ïa u lakam,

Jingdum sha jngai ban thom,

Ki khun ka lawei ba ïalam,

Ïa Ri ban rah burom.

Mano ki khmat ba ïohi jngai,

La ha jingdum synia,

Ka dongmusa ba rah khlem btai,

Jingshai ban pynthaba;

Ka suinbneng ba kan dup phyrnai,

Ki beh shajngai ïu lyoh,

Hato ymdei ki nonghikai

Ba leh kine baroh?

Mynsiem jong ki ka thrang ka kwah,

Ï'u khynnah ban ïalam,

Junom hajuh ba un ym sah,

Watla u biej tasam;

Ki kham shemphang bad kham sngewthuh

Ba burom jong ka Ri,

Ban ïai phyrnai bad kiew shuh shuh,

Ka shong ha kti jong ki.

Kumta lyngba I sur poitri,

Nga pynpaw la jingsngew,

Ba dor ki nonghikai jong ngi,

Shisha ym lah ban thew;

Ki long ki kmie ki kpa ba ar,

Burom iaki to ai,

Jingdum ka Ri kila beh phar,

Khublei ko Nonghikai.

Kane ka dei khyndiat ki symboh jingkren hapdeng jong i @mebatei_l_khongsti bad i @rj_bob_bigfm na ka Big FM 98.3 kum shi bynta jong ka jingrakhe ïa ka International Mother Language Day. Ki phang kiba ki ïa phylliew jingmut ka dei ka jingthoh poitri ha ka ktien Khasi, kumno ban pynkiew ïa ka ktien Khasi bad kiwei kiwei.

Ïa kane ka jingkren lah dep ban pynsngew ha ka 17 bad 18 tarik u Rymphang ha ka Big FM 98.3.

Khublei Shibun @mebatei_l_khongsti ! 😃🙏 Kane kan long ka jingbynrap kaba kordor ha ka page!